أنا خيط و هو حيط

أنا خيط و هو حيط
هكة يبدا عرض رشدي بلقاسمي
قصة تونس تتحكى في عرض موش طويل من حيث الوقت، لكن فيه كل شيء، فيه الشيخ العفريت و الايام كيف الريح في البريمة و فيه حكايات العروي، و فيه خطب الزعيم الحبيب بورقيبة ، فيه المرا تنسج و ترتب و تدق بالخلالة ، و فيه بعد الإشارة تكون الساعة ، تك .. فيه ذاكرتنا و فيه السدّاية و الرطّاب و الخلالة ، فيه الصوف و الطعمة و القيام و فيه ، القصبة تهبط و تطلع و فيه المرا/ الراجل وراء المنسج تهبط و تطّلع و تحط في خيط على خيط ..،،فيه الدنيا خيوط فيها المربوط و فيها المحلول و فيها المنسوج و فيها المظفور… فيها الحولي و الحايك و المغزل و القرداش… فيها الراديو يقول في الأخبار و فيها عند الإشارة تكون الساعة ، تك … فيها المرا تستنى و فيها عرس ولدها جاء و هي فرحانة ترشق و توشّق و تصلي على النبي و تزغرط،،، فيها الفرحة الكبيرة و العروسة تتجلى و الزغاريط قبب و المحفل منصوب و الأقدام تركز، لكن فيها إنت خيط و هي حيط،،،، فيها طفولة راجعة من بعيد و فرحة و فيها هم و قيود و غطاء و خوف ، فيها خيوط أغلبها مربوطة و فيها قفز على خيوط ربما ننجاو و نمنعوا ، فيها وجعية و سقوط و فيها ألم و وجايع لبدن يطيح و يصعب عليه الوقوف… فيها بحث عن أفاق جديدة و تعالي و رغبة في الصفاء و الصعود إلى الأعلى لكن المسامر برشة و الخيوط معقدة و الخرجة صعيبة …الحرية صعيبة..
أنا هذا إلي ريتو في العرض، قصة تحكات بجسد الفنان إلي فاهم إلي مهمتو صعيبة في بلاد فيها كل شيء و ناقصها كل شيء ، تونس اللغز، تونس محبتنا الصعيبة و عيشتنا الصعيبة و قلوبنا الباهية و الخايبة في نفس الوقت… تونس الشباب إلي قاعد يخدم و يبدع و إلي لازمنا نقدروه و نفهموه و نحلوا عيننا و وذنينا ربما تتعدى علينا حاجات عمرنا باش ما نفهموها..،، نشجعوا الشباب هذا و نحبوه لأنو قاعد يخدم و يبدع ..
الاستاذة هدى الكافي